ANHAAR

Department of Kashmiri

University of Kashmir

Print ISSN: 2249-510x Online ISSN: NA

یہِ کتھ چھےٚ مسلم زِ گوڈٕ چھُ ادب تہٕ پتہٕ چھُ ادبس پٮ۪ٹھ گفتگو یتھ عام پٲٹھۍ تنقید ونان چھِ ۔تخلیقی ادبچ،شٲعری کیونثر،اولیت تسلیم کرتھ آسہِ نہ یہِ ماننس منٛز کانٛہہ پس و پیش زِ ادبی گفتگوچن ترین منٛز بدلاو چھُ تیلی ییٚلہِ یہِ پننہِ زمانہ چہ زندگی قریب آسہِ۔اگر ادب محض ادبی روایتن ہُند احترام کٔرِتھ مقرر موضوع تہٕ ہیتن ہُند پھرۍ پھِرۍ ورتاو آسہِ تتھ نٮ۪سبت کانٛہہ ادبی گفتگو روزٕ کینژن ستٲیشی جملن تامےٕ محدود۔تتھ متعلق سورُے ادبی گفتگو چھُ بیکار،اگر نہٕ گفتگو کرن وول قٲریس مُڈٕ زٲنتھ شعرن ہُند تشریح کرِ۔ غزلس یا لولہٕ وژنن متعلق ہیٚکہِ یا تہٕ ‘‘واہ واہ’’ وننہٕ یتھ نتہٕ ‘‘ہے ہے’’۔

کٲشر روایتی مرثیہ یعنی سو شٲعری(منظوم کلام) ےوسہٕ پننہِ اظہار ،ہیژکِن لہجہ کِن تہٕ پننہِ نفس مضمون کہ وہراو تہِ واتناوٮ۪ر کہ اکہ خاص سلیقہ کِن پننس قومی مزازس تہٕ فکرِ نکھٕ ڈکھٕ چھےٚ،روز تھدِ ہٹہِ پرنہٕ ینہٕ واجنہِ اکہ خودمختار صنفہِ رنگۍ أکِس مخصوص دٔہرس پٮ۪ٹھ ۔کلہم پٲٹھۍ چھِ امچ ہیت نہ صرف کربلاہس ستی منسوب واقعاتن شدژ سان شکلاونس منٛز مددگار بلکہ چھے اکھ سہُ ذہنی فضا تہِ ووتلاو یتھ منٛز زمان و مکان کِس پھیرس منٛز وقوع سپدان والٮ۪ن واقعاتن آفاقیت میلان چھِ ۔گوو زِ کٲشر مرثیہ چھےٚ متعلقہٕ واقہن توٲریخی حسابہٕ ترتیب دوان ن زِ ڈراما ووتلاونہٕ چہِ ضروٗرژ حسابہٕ۔ مگر شعرن ہُند زور چھُ ژوٚر پہن خٲرجی عملہِ بجایہِ مرکزی کردارن ہنٛزِ ذہنی ،ضزبٲتی کیفیژ ووتلاونس پٮ۪ٹھ تہٕ سہُ ردِعمل شکلاونس پٮ۪ٹھ یُس مضبوط بنیٲز ہندِ پژھِ تہٕ آگہی پٮ۪ٹھ ووتلہِ

تنقیدی عمل چھنہٕ ہوہس گیٚجہِ کراں بلکہِ چھےٚ ادبی سرمایس سام ہٮ۪تھ برونٛہہ پکان۔ادب یوتاہ اعلی تہٕ تہدار آسہِ تیوتُے چھُ تمیُک تنقید تہِ معیاری تہٕ گاش ژھٹہٕ وُن آسان۔ ون گو ییٚتٮ۪ن چھےٚ یہِ کتھ تہِ صاف کرٕن لٲزمی زِ نقاد تہِ گژھِ لگہٕ ہار آسُن۔ تہِ گوو زِ تس گژھِ زیرِ تنقید ادب پارکٮ۪ن بیٚون بیٚون گونن ہٕنٛز پٲری زان غٲر شعوری حدس تام آسٕن۔سہُ گژھِ امہِ ادبٕچ زبان یہِ دپی زِ خوابن منٛز ورتٲوِتھ ہٮ۪کُن۔سہُگژھِ تتھ تہذیبس تہٕ تمدنس زُون یتۍ منٛز سہُ ادب تھنہٕ پیومت آسہِ۔ادے ہٮ۪کو ونتھ زِ أمِس نقادس چھےٚ ادبی صلاحیت پرتھ کُنہِ زبٲن ہندِس ادبس منٛز چھِ کینٛہہ واضح تنقیدی اشارٕ تہٕ ژینہٕ ون موجود آسان۔ییٚلہِ شیخ العالم لَلِ ہند ہیوٗ ‘‘ور’’یژھان چھُ تٔم چھُ گوڈے آسان زونمُت تہٕ مونمُت زِ للِ چھُ گلہِ گلہِ امرت چیٚومُت میٲنۍ کِن روحٲنی امٮرٮ۪تہٕ علاوٕ تخلیقی امرت تہِ۔ ادے گوو شیخ العالمس پننٮ۪ن پدن تہِ وٮ۪ژار ژھانڈنُک شوق۔

راہی صٲبن تنقیدی سرمایہ چھُ ‘‘کہوٹ’’ کتابہِ علاوٕ ‘‘ شار شنٲسی’’،‘‘ کٲشر شٲعری تہٕ وزنُک صوٗرتحال’’ تہٕ بیٚیہِ واریاہن رسالن منٛز چھپیے متۍ تہنٛدۍ مضمون۔امہٕ علاوٕ چھُکھ ‘‘سنگلاب’’ تہٕ ‘‘أزِچ کٲشر شٲعری’’ شفیع شوقس ستۍ اتھٕ واس کرِتھ ترتیب دژمژ۔تمن دوشومنۍ کتابن ہنٛز گوڈٕ کتھ چھےٚ توجہ طلب مگر کوسہٕ کتھ کمۍ سٕنٛز چھےٚ تہِ چھُنہٕ ننان اوِ کِن ہٮ۪کو نہٕ تِمو منٛزٕ کانٛہہ حوالہٕ دوٚیو منٛزٕ أکِس ستی منسوب کرِتھ البتہٕ ‘‘سیرت تہٕ ادب’’ انہارکس خاص شمارس منٛز ےوسہٕ گوڈٕ کتھ رٲہی صٲبن لیٚچھمژ چھےٚ سو چھےٚ واریاہ دلچسپ تہٕ تقابلی ادب جلد زٕ خاص شمارس منٛز تہندِ کلیدی خطبہٕ چھُ رٲہی صٲبن تنقیدی سرمایس دیت کھرٕ کرنہٕ وزِ ضروری زیرِ نظر تھاوُن تہٕ أتی ہیٚکہِ کہوٹ کتابہِ ہند مطالعہٕ کرنہٕ ستی ووتلن وول تاثُر پایدار بنتھ ۔

کٲشرِس تنقیدس منٛز نفسیاتی تنقیدکٮ۪ن انہارن ہنٛز کتھ کرنہٕ برونہہ وُچھو زِ نفسیاتی تنقید کیا چھُ تہٕ موخصر پٲٹھۍ وُچھو امکِس آغازس پسہِ پردٕ کمن تصوراتن ہند عمل دخل چھُ ۔جدید نفسیاتی تنقیدکہ آغازُک بنا چھُ دراصل جدید نفسیاتس منٛز فرایڈ،اٮ۪ڈلر تہٕ یُنگ سٕندِ مطالعہٕ۔خاص پٲٹھۍ چھُ اتھ منٛز فرایڈ سُند تحلیلِ نفسی مطالعُک عمل دخل نمایاں ییٚمیُک ورتاو تمۍ موٗلہٕ تلہٕ تفسیاتی امراضن ہندِ علاجہِ باپت کوٚرمُت اوس،چنانچہِ ادبی تنقیدس منٛز امکہِ ورتاوٕ پتہٕ آو یتھس تنقیدس تحلیل نفسی ادبی تنقید تہِ وننہٕ۔ اما پوٚز یہِ ونُن تہِ چھُ ضروٗری زِ امہِ قسمہٕ کہِ تنقید باپت چھنہٕ کانٛہہ وٲحد وتھ ۔بلکہِ چھُ امہِ وندکٮ۪ن نظرین باہم اختلاف تہَ۔

کٲشرِ ادبُک تہٕ خصو صن کٲشرِ شٲعری ہند طالب علمآسنہٕ کِن پیٚوو مےٚ سہُ سورُے تنقید تہٕ تحقیق پرُن یُس عبدالاحد آزاد سندِ پٮ۪ٹھٕ ازتام لٮ۪کھنہٕ آمُت چھُ ۔کینژھا پننہِ درسی مجبوری کِنی تہٕ کینژھا پننہِ سوخن فہمی ہندِ مارٕ متہِ۔امی درسی مطالعن تہٕ سوخن فہمی ہندِ ادراکن پھانپھلیوو میون تنقیدی شعور تہٕ مےٚ چھُ شعر پرُن تہِ تگان تہٕ پرزِناوُن تہِ۔

از برونٹھ تقریبن ارداہ وری لیچھوو مے دھونہِ کہِ حوالہٕ لل دٮ۪دِ ہنٛزِ شٲعری متعلق اکھ مختصر انگریز مضمون ییٚمہِ کِس اختتامس پٮ۪ٹھ مےٚ یہِ توقع ظاہر کریو زِ برونہہ کُن کرن زانن وٲلی تہٕ مٲہر اتھ سلسلس منٛز تفصیلی بحث یُس سانٮ۪ن ذہنن امہِ پتھ کٲلی شعری جمالیات کہِ مخصوص تصور ستی گاشراوِ۔مگر میون توقع روٗد توقعہس تامےٕ محدود تہٕ کٲنسہِ سنسکرت زانن وٲلی کٲشرِ نقادن دیُت نہٕ اتھ کُن توجہ۔میٲنۍ ووستاد پروفیسرگلشن مجیدن کوٚر حالےٕ منعقد کرنہٕ آمتس سیمنارس منٛز امہِ کتھِ ہند ذکر تہٕ مےٚ میج ازیُک مضمون لٮ۪کھنہٕ خٲطرٕ تحریک۔ مےٚ چھُ ییٚمہِ کتھِ ہند از تہِ احساس تہٕ مذکورٕ انگریزۍ مضمون لٮ۪کھنہٕ وزِ تہِ اوسُم زِ مےٚ چھُنہٕ سنسکرت زبٲنۍ ستی کانٛہہ وٲقفیت تہٕ یہِ پرگی تہٕ اڈلیٚچر ہیٚکہِ میانہِ ییٚمہِ لیکھُک نقص تہِ بنتھ۔

کٲشرِ شٲعری ہنٛز ریوایت چھےٚ کٲشرٮ۪و نثری اصنافو کھوتہٕ واریاہ پرانی۔‘‘چھُم پد’’،‘‘سنگرہشلو’’بےترِ ہِو فلسفیانہٕ پوشہِ گوندۍ یوٚدوَے کٲشرِ شٲعری ہندِ پوشہِ باغٕک ابتدٲیی نمونہٕ چھِ، اما پوٚز یِم چھنہٕ فہمس منٛز ینہٕ وٲلۍ۔ لل دٮ۪د ہش سروِ قد چھےٚ کٲشرِ شٲعری ہنٛز پزنہٕ دسلابہٕ کار تہٕ کوٗنژہم عصر نند ریش چھُ شٲعری ہندِس اتھ باغس سگہٕ ون وول بیاکھ شٲعر۔یمن دوشوٕن ہنٛز شٲعری چھےٚ فہمس منٛز ینہٕ واجِن۔ لل واکھن تہٕ شیخہٕ شُرکٮ۪ن ہُند فارم چھُ بیشتر پٲٹھۍ ہیوٗ، گاہے چھےٚ مصرعن ہٕندِ تعداد ہشرن،گاہے چھےٚ ردیف قافیہ کہِ ورتاوٕچ ہشرن تہٕ کُنہِ کُنہِ چھِ بےٚ قافیہ مصرعہ تہِ ورتاونہٕ آمتۍ ہیت اعتبارٕ چھےٚ للٕ واکھن مقابلہٕ شرکٮ۪ن منٛز رنگا رنگی تہِ زن گوٚو شرکٮ۪ن منٛز وژنکۍ انہار تہِ ویدۍ۔وژن چالہِ طویل نظمن منٛز چھِ بار بار ووج مصرعہ ورتاوس منحز آمُتٔ‘‘کروٗدنو مسلمانس پزے’’،‘‘بار خدایا پاپ نِوار’’ تہٕ ‘‘یُس کرِ گوٚنگُل سُے کرِ کراو’’ ووج مصرعہ واجنہِ نظمہِ چھےٚ امہِ انمانہٕ کینٛہہ مشہور شعرٕ نمونہٕ۔

کٲشرٮ۪ن چھُ صدیو پٮ۪ٹھٕ زندگی ہندٮ۪ن مظہرن منٛز حسنس تہٕ حٲرتس درمیان تفریقُک شعوٗر روٗدمُت۔تمو کٔرۍ اتھ سلسلس منٛز کینٛہہ واضح تہٕ غٲر واضح اصول تہٕ قٲعدٕ متعین تہٕ یہے بنہٕ بندی چھےٚ سانہِ جمالیٲتی قوژ ہنٛز نمایندگی کران۔ییٚلہِ کُنہِ فنہٕ پارٕچ مولہٕ ون جمالیٲتی شناخژ پٮ۪ٹھ کرنہٕ آسہِ یوان دپۍ زٮ۪و یوہے گوو‘‘ادبی تنقید’’۔ادبی تنقید ہیٚکہِ موضوعی تہِ معروٗضی تہِ ٲسِتھ۔موضوعی ادبی تنقیدُک اظہار چھُ تاثراتی تنقیدچہِ لونچہِ گنڈنہٕ یوان ییٚلہِ زن معروضی تنقید فن پارکہ تجزیہ ستۍ برآمد کرنہٕ آمتٮ۪ن مسلن ستۍ واٹھ چھُ ۔کٲشرٮ۪و اوس أکِس جمالیٲتی تحریکہِ زایُن دِتھ تتھۍ ادبی میٖژ بدِ کٔڈمت یِم فن پارچہِ تجزیٲتی عملہِ ہندِ تکمیلس منٛز نہایت کارگر ماننہٕ آیہِ۔‘‘دھۄنہِ’’ تہِٕ ‘‘رس’’ ہِو جمالیٲتی نظریہ چھِ سانہِ ادبی تنقیدک زٕ بٔڈۍ ادبی کارنامہٕ یِمو سانٮ۪ن فن پارن ہندۍ شعری تہٕ جمالیٲتی اقدار نٔنۍ کٔڈۍ۔

ادب تہٕ شٲعری چھےٚ سو تخلیقی عمل یتھ اندر شٲعر تہٕ ادیب پننٮ۪ن جذباتن تہٕ خیالاتن ہُند اظہار منٲسب لفظن منٛز کران چھِ ۔یہِ کتھ چھِ ۔یہِ کتھ چھِ ٲسۍ تھےٕ زِ ادب تہٕ شٲعری چھےٚ اکہِ مخصوص ماحولہٕ منٛزٕ ووپدِتھ اکھ صورت رٹان یتھ مذکورٕ ماحولٕک عنصر تہٕ اجزا ٹاکارٕ چھِ آسان۔تنقید چھُ پننہِ دورکٮ۪ن بے ترتیب خیالاتن،فکری رجحانن تہٕ احساساتن مرتب کران۔

ادب چھُ زندگی ہُند ترجمان تہٕ تفسیر آسنس ستی ستی امیُک تنقید تہِ۔اتھ سیٔز وتھ ہاوٕنۍ،امِچ جانچ پڑتال کرٕنۍ تہٕ امِچ اہمیت تہٕ قدرو قیمت سمجِن تہٕ سمجاوٕنۍ چھےٚ ادبی تنقیدٕچ کٲم۔ادب تخلیق کرنس لرِ لوٚر چھےٚ یہِ عمل تہِ ستی ستی سپدان روٗزمٕژ ییمیُک مقصد ادبٕچ شود بود تھاون والٮ۪ن ہندِ خٲطرٕ ادبٕچ وٮ۪ژھنے،ادبی خٲمین تہٕ خوبین ہنٛز نشاندہی کرٕنۍ،ظاہر کرنہٕ آمتس تجرُبس متعلق پنٕنۍ راے تہٕ ردِ عمل پیش کٔرِتھ اتھ اندر پوشید مختلف معنین ہٕنٛز تشریح کرٕنۍ چھُ ۔یہِ کٲم انجام دِنہٕ وٲلِس چھِ نٲقد یا نقاد ونان۔

ساختیات بٲنی کار چھُ فرڈی ننڈ سوسیر۔سوسیرن دتی جنیوا یونیورسٹی منٛز لسانیاتس پٮ۪ٹھ لیکچر یِم أمۍ سٕندٮ۪و دویو طٲلبہِ علمو أمۍ سٕنٛدِ مرنہٕ پتہٕ دویہِ وہرۍ ۱۹۱۶ عیسویس کتابہِ ہندِس صورتس منٛز شایع کرۍ تہٕ ناو تھووہس course De Linguistique Generale مگر عالمی ادبس منز گے سوسیر سندۍ خیال اَمہِ کتابہِ ہندۍ انگریز ترجمہ۱۹۵۹ پتہٕ عام۔دراصل اوس یہِ سوسیرن لسانیات خٲطرٕ اکھ نوٚو فلسفہٕ دیتمُت مگر وارٕ وارٕ گر یم خیال بشریات،ریاضیات،طبیرات،حیاتیات تہِ ادبس منٛز مروجہ۔ادبی تنقیدس منز ییٚلہِ ساختیاتُک ورتاو کرنہٕ آو تتھ آو ساختیاتی تنقید وننہٕ۔

نٔوِس تنقیدس تہٕ امہِ کِس وٮ۪وہارس متعلق کتھ کرنہٕ برونٛہہ چھُ ییٚمہِ کتھِ ہُند خیال تھاوُن ضروٗری زِ مذکورٕ نظریہِ برونٛہہ کمن عنٲصرن ٲس شٲعری منٛز اہمیت تہٕ تمہِ اہمیٔژ ہٕنٛز نوعیت کیاٲس؟ وُچھوَے تہٕ امہِ تنقیدٕکۍ بیٲلۍ پھٔلۍ چھِ تتھ سٲری سےٕ تنقیدی موادس منٛز بےٚ شوٗنکۍ پٲٹھۍ کار فرنا یُس افلاطونہٕ سٕنحدِ پٮ۪ٹھٕ نوِ تنقیدکِس بارسس یِنس تام لٮ۪کھنہٕ آو۔خود افلاطون ندِس تنقیدس منٛز تہِ چھِ یِم عناصر موجود،یِمن ہندِس بنیادس پٮ۪ٹھ افلاطونن شٲعری ہندس سحرس پٮ۪ٹھ کتھ کرمٕژ چھےٚ۔ کتھِ واش کڈنہٕ خٲطرٕ ٲس سٲرسےٕ تنقیدی موادس سام ہیٚنۍ ضروٗری۔یُتھ یہِ کتھ عیان سپدِہے زِ کتھ دورس منٛز کمن نوقطن ٲسۍ نقاد اہم گنزران،تکیازِ پرتھ کانٛہہ علم تہٕ فن تہٕ تتھ متعلق نظریات چھنہٕ ہنگہٕ منگہٕ بارسس یوان۔

وہمہِ صدی منٛز ییٚتہِ انسٲنی زندگی ستی وابستہٕ پرتھ شعبس منٛز بارٕ تبدیلی آیہِ تتہِ رود نہٕ ادب تہِ امہِ نشہِ مُچھِ۔ادبی تواریخس منٛز آے اتھ صدی منٛز کٔہیا ادبی رحجان تہِ نظریہ بارسس تہٕ یِموے منٛز چھُ اکھ اہم نظریہ تجریدیت۔تجرید لفظ چھُ انگریز لفظabstract لفظُک ترجمہٕ ییٚمیُک معنے خیٲلی یا سو کیفیت چھےٚ یوسہٕ صرف محسوس کرنہٕ ییہِ یا صرف سوچنہٕ ییہِ۔ ادبس منٛزآو یہ، تصور مصوری ہندِ فنہٕ پٮ۪ٹھٕ۔یعنے امیُک تعلق چھُ دراصل فنِ مصوری ستی تہٕ یہِ چھُ امہِ فنُک اکھ خاص حصہٕ یُس پانناونہٕ وزِ اکھ مصور رنگن ہنٛزِ زبٲنۍ تِمن ہُند غٲر واضح استعمال کران چھُ تہٕ یِم رنگ چھِ ۔

شٲعری چھےٚ پرتھ دورس منٛز انسٲنی احساساتن تہٕ انسان سندِس دل و دماغس رنزناوان روٗزمٕژ تہٕ یہِ دٔپۍ زِ تہِ دانشورن،ادیبن،مفکرن،گونماتن تہٕ نقادن ہند دِل پانس کُن پھران روٗزمٕژ۔زندگی تہٕ کایناتُک ادراک چھُ اکھ دانشوررانہٕ عمل تہٕ انسان چھُ پرتھ چیزٕچ ہیت تہٕ امکۍ گوٚن معلوم کرنہٕ باپت پننٮ۪ن جذبن،ہوشن تہ حواسن کٲم ہٮ۪وان یا ونو یتھٕ پٲٹھۍ زِ یہِ چھُ عقلہِ تہٕ شعوٗرس وتہٕ ہاوک بناوان۔لہذا چھِ کایناتٕکۍ تمام موجودات اکھ راز تہٕ پرتھ کانٛہہ پرکھ تھاون وول چھُ پننہِ تجربہٕ،فہم تہٕ ادراک ستۍ اتھ وسعت بخشان۔شعریات تہِ چھُ یتھےٕ اکھ علم یُس تخلیٮقی،تخیلی تہٕ لاشعوری عملہِ وجود چھُ پراوان۔

رحمان راہین ‘‘صدا نظم’’ چھےٚ مانگیہِ ہنٛز س عمل یتھ منٛز کانٛہہ بنمہِ منصبُک شخص کٲنٛسہِ ہیٚرمہِ منصبکِس شخصس التجا یا آلَو دوان چھُ ۔یہِ عمل پوٗرٕ پٲٹھۍ سمجنہٕ باپت چھُ ژورن کتھن ہند زانُن ضروری:اکھ گوٚو صدا لاین وول تہٕ بوزن وول کُس چھُ؟دوٚیِم صاد کیاہ چھُ لاینہٕ یوان؟ترٛیِم صدا کیازِ چھُ لاینہٕ ےوان؟ژوٗرِم یہِ زِ صدالاینہٕ پتہٕ کیاہ چھُ سپدان؟یتھ مقالس منٛز چھےٚ مےٚ رحمان راہی سٕنٛز ‘‘صدا’’ نظمہِ یٕوٕے ژورو کتھو منٛز صرف گوڈنچہِ کتھِ ہندِس تناظرس منٛز سام ہٮ۪نٕچ کوشش کٔرمٕژ۔

پرتھ کُنہِ شعرٕ صنفہٕ چھُ مختلف شعرٕ ولن ہند ورتاو سپدان تہٕ پرتھ کانٛہہ شٲعر چھُ یِمن ولن ہند ورتاو شعوٗری تہٕ غٲر شعوٖری پننِس فن پارس منٛز کران۔یِم ول چھِ بیٚون بیٚون مثلن تشبیہ،استعارٕ،تمثیل،پیکر،مجازِ مرسل بیترِ تہٕ یِمو ستی چھُ سہُ فن پارٕ واریاہ وُسعت لبان۔شٲعر چھُ پننہِ ہنرٕ مندی ستی فن پارس جہار دِنُک جستہٕ خیز کران تہٕ کانٛہہ تہِ شعرٕ صنف چھنہٕ یِم ول ورتاو نشہِ مچھِ آسان تہٕ یوہے صورتحال چھُ سانہِ کٲشرِ غزلُک تہِ۔اتھ منٛز تہِ چھِ مذکورٕ ولن ہند ورتاو سپدان تہٕ پرتھ کانٛہہ شٲعر چھُ پننہِ پننہِ بترِ تہٕ مقدورٕ مطٲبق یِمن ولن کٲم ہٮ۪وان۔

پروفیسر غلام محد شاد چھُ وہمہِ صدی ہُند اکھ معتبر شٲعر،نقاد،محقق،ترجمہٕ کار تہٕ ترتیب کار ییٚمۍ پننہِ تخلیقی ہنر مندی تہٕ تحقیقی صلٲحیژ ستی نثری کیو منظوم ادب پارٕ لٮ۪کھِتھ کٲشرِ زبٲنۍ تہٕ ادبس وسعت تہٕ وہراو بخش۔شاد صٲبس ییٚتہِ دون عظلم المرتب صوفی شٲعرن احد زرگر تہٕ صمد میرس ستی وتھُن بِہن چھُ روٗدمُت تتہِ چھُ سہُ تصوفکٮ۪ن زولانن منٛز قٲد روزنہٕ بجایہِ نٲدم،کٲمل،رٲہی بیترِ بہلہِ پایہِ ادیبن ستی پکِتھ پننہِ تخلیقی ہنرمندی ہند باس دوان چھُ ۔یمن معتبر ادیبن ہندِس تخلیقی قلمس مقابلہٕ باقی ادیبن ہند ٹارِکھسُن اوس واریاہ مشکل تہٕ أتھۍ ادبی ماحولس منٛز چھُ شاد صٲب تہِ پنٕنۍ اکھ منفرد پرزنتھ قٲیِم کرنٕچ کوشش کران۔

حامدی کشمیری صٲبنۍ ‘‘حضورن کُن’’ نظم چھےٚ اکھ نثری نعتیہ نظم۔یہِنظم چھےٚ نارس اتھ واس شعرٕ سومبرنہِ ہند اکھ مٲرۍ موٚند فن یُس پننہِ لب و لہجہ کِنۍ تہٕ زبٲنۍ ورتاو کِنۍ بارسس چھُ آمُت۔اتھ منٛز چھُ اسلٲمی توٲریخ کہِ تمہِ واقہُک اکھ تخلیقی اظہار کرنہٕ۔اتھ منٛز چھُ اسلٲمی توٲریخ کہِ تمہِ واقہُک اکھ تخلیقی خاکہٕ پیش کرنہٕ آمُت یتھ عرفہ عامس منٛز ہجرتُک واقعہ ونان چھِ ۔یہِ واقعہٕ چھُ او ک،نۍ تہِ اہم زِ امہِ پتے سپز مدینس منٛز اکھ فلاحی اسلٲمی ریاست قٲیِم ییٚمہِ کِہ قٲیِم سپدنہٕ پتے اسلام جزیرے نما عرب منٛز نیرتھ دویمٮ۪ن ملکن کُن پھہلیاو۔

انسٲنی تہذیبن ییٚلہِ ارتقٲیی منزل طے کٔر تہٕ فن کٮ۪ن سارنےٕ شعبن منٛز آیہِ پوختگی یتھ منٛز خاصکر شٲعری قٲبلِ ذکر چہےف۔ےوٚدوَے گوڈٕگوڈٕ اتھ منٛز دوٚیمٮ۪ن فنن ہند رَل اوس یِمن منٛز موسیقی تہٕ رقص خاص کر قٲبلِ ذکر چھِ ۔مگر وقت سورنس ستی ستی پروو موسیقی تہٕ رقصن اکہِ الگ،مسقبل تہٕ خود مختار فنچ صوٗرت۔وونۍ گوٚوو شٲعری کوٚر نہٕ مکمل طور قصہ تہٕ موسیقی نش انحراف بلکہِ روٗزِ شٲعری یِمن دون ہٕنٛزِ ٲڈرنہِ نش پرتھ زمانس منٛز پنُن دامانہٕ وسیع کران۔اوے چھُ بڈٮ۪ن بڈٮ۪ن شٲعرن تہٕ نقادن ہُند ونُن زِ شٲعری چھےٚ انسٲنی جذبن ہند نغمٲتی اظہار۔ووںی ہرگاہ جذبن ہند اظہار نثرس منٛز تہِ کرنہٕ چھُ ےوان مگر تتھ منٛز چھےٚ نہٕ نغمٲتی تاثرات تہٕ موسیقی ووپزاو پراوان ییٚلہِ زن شٲعری منٛز موسیقی اکھ خاص اہمیت چھےٚ تہٕ یوصہٕ برونٛہہ کُن فن پارس منٛز دون صورتن منٛز نٔنۍ چھِ نیران۔

جدید شٲعری لوٚب کٲشرِس منٛز۱۹۶٠ یور کُنے زایُن۔یہِ ٲس برونہمہِ شٲعری نشہِ یکسر مختلف۔مختلف اوٕ کِن زِ یُس مزاز تہٕ ہوا نوا پٲدٕ سپُد سہُ اوس برونہمہِ مزازٕ نشِ ڈٔلِتھ ۔لہذاٲس یہِ وقتٕچ منگ زِ شٲعری گژھِ فنی تہٕ موضوعی اعتبارٕ جدید سونچن تراین تہٕ زندگی نکھٕ ینۍ۔مطلب یہِ زِ شٲعری گژھِ محاورٲتی موضوعن تہٕ تجربن آیژ روزنہِ بجایہِ زندگی در پیش مسلن تہٕ تجربن زٮ۪و دِن