ANHAAR

Department of Kashmiri

University of Kashmir

Print ISSN: 2249-510x Online ISSN: NA

انسانےٕ یوت چھُ اکھ زُوادر ےس دنیاہس منٛز پننِس آسنس پٮ۪ٹھ حیران چھُ تہٕ سوال چھُ کران زِ سہُ کیازِ تہٕ کمہِ باپت چھُ ووتلان،ستم ژالان تہٕ پوتس فنا سپدان۔عام زندگی منٛز ہٮ۪نہٕ آمُت غافل انسان زندگی اکہِ رسمہٕ پٲٹھۍ زُوان تہٕ کُنہِ دٲنشورانہٕ پریشاٲنی تہٕ ہیہات ورٲے جکھان،زُوان،ژالان تہٕ پوٚتُس خاک سپدان،مگر دٲنشورانہٕ آیہِ زندگی زُون وول چھُ ہمیشہ پننِس گُدرنس پٮ۪ٹھ سوچان تہٕ سوال پرژھان۔

اِپک تھیٹر چھ ۱۹۲٠ کِس دہلس منٛز جرمنی منٛز شروع سپدمُت۔امہَ رنگہٕ کہِ تھیٹرُک محرک چھُ تھیٹر ڈایریکٹراِوِن پِسکیٹر امہِ رنگہٕ کِس تھیٹرس چھُ یہِ ناوا ہندی دٔسۍ دِنہٕ آمُت مگر امہِ نہجہِ ہُند ساروے کھوتہٕ بوٚڈ ڈراما نگار چُ برٹوٹ بریخت۔بریخت اوس اکھ ممتاز شٲعر،باصلٲحیت سٹیج ڈایریکٹر تہٕ ڈراما نگار۔۱۹۲٠ تہٕ ۱۹۵۲ کِس مدتس دوران لیکھۍ تٔمۍ کینٛہہ شہرۂ آفاق ڈراما یِمو دٔسی ڈراما کٮ۪ن کلاسیکی تصورن نش انحراف کٔرِتھ نظریٲتی طور نوٮ۪ن سرحدن واتناونہٕ آمُت چھُ ۔بریخت سُند ادبی سفر ہٮ۪کو أسۍ مختلف دورن منٛز بٲگرِتھ ۔پنٕنۍ کینٛہہ ابتدٲیی ڈراما لیکھ تٔمۍ جارج بکنر تہٕ ویڈ کاینڈ زیر اثر۔یِم ڈراما زندگی نٮ۪سبت تسُند منفی تہٕ منکرانہٕ رویہِ برونٛہہ کُن انان چھِ۔ ۱۹۲۴ ہس منٛز ووت سہُ برلِن ییٚتہِ تٔمۍ اکھ ڈراما کلبہٕ باپتھ ڈراما نویسی کٔر۔

امہِ برونٛہہ زِ رزمیہ شٲعری یا ایپِک پویٹری یا رزمیہ کِس لسٲنی ساختس معنوی افٲدیتس یا تٲریخی یا اسطوری کردارس یا امہ کٮ۪ن موضوعاتن تہٕ اسلوٗبیاتی امتیازاتن تہٕ شرایطن متعلق ییہِ کتھ کرنہٕ ضروری چھُ زِ etymology ہندس علمی انکشافی بنیاد کہِ حوالہٕ ییہِ ابتداہس منٛز کتھ کرنہٕ۔لفظ epicیا رزمیہ چھُ یونٲنۍ زبٲنۍ ہندِ گۄڈ لفظ یعنیepikos منٛز ژارنہٕ آمُت ییٚمیُک لغوی معنی لفظ بٲتھ یا باوتھ چھُ ۔ادبی یا شعری اصطلاحس منٛز چھُ epicتتھ ریوایژ مرکوٗز ضٲبطہٕ بند،تتھ مُسغل نظمٲوی کہانی یا دلیلی ونان یتھ منٛز کُنہِ لسٲنی،تٲریخی یا تہذیبی خطس منٛز زنم لبن وٲلِس مقبول تہٕ معروف قومی ،نسلی،تٲریخی،نیم تٲریخی یا اسطوری ہیرو سندٮ۪ن جنگی کارنامن،تمی سٕنٛز جرات مندی تہٕ ولہٕ ویری،تمی سندٮ۪ن مُتکلاتن،مہماتن تہٕ کامیٲبین تہٕ کامرٲنین ہنٛز اعلی سجاوٹی،نذاکتی تہٕ پُر وٮ۪قار شعری ہا اسلوٗبس منٛز آسہِ آمژ باوتھ کرنہٕ۔

اوپیراopera چھُ ڈرامہ تھیٹرُک اکھ اندازٕ یتھ منٛز غٲلب تہٕ بنیٲدی جُز موسیقی چھُ ۔اتھ منٛز چھُ گلوکار آوازِ ستی ستۍ پننٮ۪ن جسمٲنی حرکژ کانٛہہ خاص مقصد تماشہِ بینن تام واتناونہٕ باپتھ کٲم ہٮ۪وان یعنی آرٹسٹ چھُ گلوکٲری تہٕ اٮ۪کٹنگ تہِ کران۔پننٮ۪ن أچھن،بُمن،بُتھِس،کنن،اتھن،نرٮ۪ن تہٕ زنگن چھُ حرکژو ستی شیٚچھۍ پٲغام واتناونٕچ کٲم ہٮ۪وان ییٚمہِ شیٚچھِ ہُند عوامی کارکردگی باپت ضرورت آسان چھُ ۔

کامیڈی چھےٚ قدیم یورپی صنفو منٛز اکھ اہم صنف ییٚمۍ قبل مسیح ہس منٛز تاریخی اعتبارٕ گوڈنکہِ پھرِ ےونانس منٛز زایُن لوٚب تہٕ یونانُک مشہور کامیڈی ناگر ارسٹوفینزAristophanes چھُ کلاسیکل کامیڈی حوالہٕ سٲرسےٕ عالمی ادبس منٛز اکھ ویٚود ناو۔تمۍ سٕنز مشہور کامیڈیThe Wasp,(422 B.C),The Clouds(423 B.C) The Frogs (405 B.C) ہشہِ کامیڈی چھےٚ پننہِ دور چٮ۪ن سیٲسی،سمٲجی تہٕ فلسفیانہٕ سوچہِ تراین پٮ۪ٹھ طنز تہِ تہٕ تہنٛز عکٲسی تہِ۔کامیڈی ہنٛز یہِ صنف ییٚمہِ ساعتہٕ انگلستانس منٛز بحیثیت ڈرامٲیی صنف متعارف سپز امہِ لٔب خصوصن شیکسپیر سندۍ دٔسۍ اکھ نٔو آے تہٕ نٔو تراے تہٕ یتھٕ پٲٹھۍ آیہِ یونٲنۍ کامیڈی مقابلہٕ اکھ نٔو کامیڈی بارسس یتھ Tragic comedy ونان چھِ ۔

عالمی ادبچن جدید نثری صنفن منٛز چھُ افسانہٕ اکھ اہم ادبی صنف ماننہٕ یوان۔افسانہٕ آو ساروٕے کھوتہٕ برونٛہہ انگریزی زبٲنۍ اندر لٮ۪کھنہٕ۔افسانس چھُ انگریز پٲٹھۍ شارٹ سٹوری ونان تہِ دٔپتھ گوٚو مۄخصر کتھ یا دلیل۔دلیل بوزُن تہٕ بوزناوُن چھُ سٮ۪ٹھاہ پتھ کالہٕ پٮ۪ٹھٕ انسانہٕ سُند محبوب مشغلہٕ روٗدمُت۔تقریبن پرتھ مذہبی کتابہِ اندر چھےٚ بے شُمار کتھٕ اساطیرن،تمثیلن تہٕ تلمیحن ہنٛزِ شکلہِ اندر موجود یِمأسۍ از تہِ شوقہٕ سان پران یا پھران چھِ ۔افسانٕچ بُنیاد تہِ چھےٚ دلیلےٕ اما پوٚز دلیلہِ تہٕ افسانس چھےٚ فرق زِ دلیل ییٚتہِ زبٲنۍ زبٲنۍ پھرنہٕ یوان چھےٚ،افسانہٕ چھُ خاص کٲنسہِ مصنف سُند تخلیق آسان۔لفظ افسانہٕ ییٚلہِ أسۍ امہِ کٮ۪ن جدید معنین منٛز نمہٕ ہون میون مطلب چھُ سۄ لٮ۪کھنہٕ آمٕژ کتھ یا دلیل یتھ منٛز صرف اکہِ واقعہٕچ تصویر کشی سپزمٕژ آسہِ،یتھ اندر وحدتِ تاثُر آسہِ تہٕ یۄسہٕ مۄخصر آسہِ۔

کٲشرِس منٛز چھُنہٕ ساینسی ادب یا سہُ نثر تخلیق کرنہٕ آمُت یُس ساینسی مضامینن پٮ۪ٹھ چھُ ۔یہِ چھُ خٲلص مغربی صنف۔کٲشرِس منٛز چھنہٕ زیادٕ توقع زِ زیادٕ جلد سپدِ یہِ صنف مقبول تکیازِ ییٚتہِ چھُنہٕ سہُ ساینسی مزاج،منہج یا شعور بڈس پیمانس پٮ۪ٹھ نظرِ گژھان۔یتھ مقالس چھِ حصہٕ گوڈنیُک حصہٕ چھُ ساینس فکشن تہٕ امکۍ اہم موضاعات،دویِم حصہٕ کینژن اہم نمونن ہند تذکرٕ،تریِم حصہٕ چھُ یہِ کتھٕ کٔنۍ چھُ ادبکِس ریوایتس پٮ۪ٹھ کینٛہہ سوالہٕ تُلان تہٕ معنی کتھٕ کٔنۍ چھُ قدیم خابن ہندِ تعبیرُک اکھ اہم ذریعہ۔

اوڈ چھُ یونٲنۍ زبٲنۍ ہُند اکھ لفظ تہٕ امیُک معنی چھُ کورِک سانگ choric song یعنی سہُ نغمہٕ یُس یونٲنۍ ڈرامہس منٛز کورس گٮ۪چان اوس۔یونانس منٛز لوٚب أمۍ شارٕ صنفن عروج تہٕ تمہِ پتہٕ آو لاطینی زبٲنۍ منٛز تہِ امیُک رحجان لبنہٕ۔اوڈس چھِ پنٕنۍ اکھ مخصوص تٲریخ تہٕ باقی کینژن شعری صنفن ہندۍ پٲٹھۍ چھُ امیُک آگُر قدیم یونان۔یونانس منٛز اوس پنڈار اکھ ناماوار شٲعر یُس پوٗنژمہِ صدی قبل مسیح منٛز لٮ۪کھان اوس۔یہندس اوڈس چھُ پنڈارُک اوڈ ونان۔امہِ پتہٕ لوٚب اوڈن رومن شٲعر ہورس سندِ دٔسۍ پوچھر۔یہندِس اوڈس چھِ ہوریشین اوڈ ونان۔امہِ علاوٕ آیہِ سدٲہمہِ تہٕ اردٲہمہِ صدی عیسوی منٛز اوڈٕچ بیاکھ اکھ قسم تہِ ورتاونہٕ یتھ Ode Irregular ونان چھِ ۔

کنوہمہ صدی ہندِ تریمہِ دٔہلہِ پتہٕ ےوسہٕ مہمل شٲعری ہٕنٛز روِش بارسس آیہِ تمہِ ستی ہیٚوتُن ادیبن،مفکرن،لِکھارٮ۪ن تہٕ ناٹک کارن زندگی ہنٛدِ بے معنویتُک شعوٗر پٲدٕ گژھُن۔امہِ برونٛہہ تہِ چھُ انسان،ماحول تہٕ کاینات کِس باہمی رشتس متعلق ارسطوٗAristotle چاسرChaucer،پوپ Pope،بلزاک ہوٮ۪ن لِکھارٮ۪ن ہندِ دسۍ آمتٮ۪ن بحثن منٛز آدمہٕ سندِ بے معنویتٕکۍ تہٕ نا معٮقولیتٕکۍ اشارٕ ننۍ تہٕ ٹاکارٕ۔ڈاڈیت تہٕ سریلیت ۔

سولی لوکی یا سیلی لِکوی لفظ چھُ مُلہٕ تلہٕ لاطینی زبٲنۍ ہند لفظ۔سیلی معنے گوٚو پٲنۍ پانس ستۍ تہٕ لِکوی گوو کتھٕ کرنہِ۔سولی لوکی یا سیلی لِکوی گو پٲنۍ پانس کُن مخٲطب سپدِتھ خود کلٲمی ہٕنٛز عمل۔یہِ لفظ یا اصطلاح کوٚر الجیریاہس نزدیک ہِپو شہرس منٛز روزن وٲلۍ مذہبی عٲلم آگسٹنن گوڈنچہِ لٹہِ استعمال۔ژوٗرمہِ صدی عیسوی اندر لیچھ یِمو اتھ عنوانس تحت اکھ کتاب یتھ ناو چھُ“ سولی لوکیز آف آگسٹن آف ہپو“ امہِ کتابہِ ہند مواد چھُ ا۔تھۍ خودکلٲمی یا ونوInner Dialogueگن پٮ۪ٹھ مشتمل۔اتھ کتابہِ اندر چھُ پانے سوال آمٕتۍ تُلنہٕ تہٕ پانے جواب تہِ دنہٕ آمتۍ۔اتھ اندر موجود بحثُک تہٕ خود کلٲمی ہند تعلق چھُ ذٲتی علمس ستی۔اتھ اند چھُ رُح تہٕ امہِ کِس عین تہٕ اصلس یعنےEssence متعلق سوال کرنہٕ آمٕتۍ۔

ڈرامیٹِک مونو لاگ چھُ بنیٲدی طور شٲعرانہٕ اظہار یا صورت یوسہٕ ڈرامہن منٛز استعمال سپدان چھےٚ۔اکھ کُن زون کردار چھُ اتھ منٛز پٲنۍ پانس ستۍ کتھٕ کران یتھ خود کلامی ونان چھِ ۔ ڈرامیٹِک مونو لاگس منٛز چھِ ترےٚ نمایاں حصہٕ:بولن وول،دوٚیِم بوزن وول تہٕ تریِم گوو ڈراما۔ لکھٲرۍ یا شاعر چھُ کانٛہہ کردار تھُرِتھ پننٮ۪ن اندروٗنی احساساتن،جذباتن،ذہنی ۔کشمکش،کینژن گُپت رازن مخصوص شخصیژن یا صورت حالس متعلق کُنہِ رکاوٹہٕ ورٲے منحذ واضح پٲٹھۍ تہٕ کُنہِ ساعتہٕ مضمر اندازس منٛز اشارتن انکشاف کران۔ ڈرامیٹِک مونو لاگس منٛز چھِ آسان بیٚیہِ تہِ کردار تہٕ تماشہِ بین یِمن برونٹھ کنہِ کُن کردار لگاتار بولان چھُ مگر پانسےٕ ستۍ تہٕ تماشہِ بین چھِ خاموشی اختیار روزان کرتھ تہٕ اورٕ چھُنہٕ کانٛہہ ردِ عمل کران۔

طنز Satire چھُ ژکہِ لاطینی لفظ سیٹورا نشہِ درامُت معنہِ چھُس رلہٕ مِلہٕ۔یوتام زن زنگریزی لفظ satire رُک تعلق چھُ کٲشرِس تہٕ اردوہس منٛز چھُ یوہے طنز لفظس برابر۔آ۔یہِ چھُ پوٚزِ زِ طنز چھُ پوٗرٕ پٲٹھۍ امیُک متبادل لفظ مگر تہِ کٔرِتھ تہِ چھُ یوہے لفظ اتھ ساروےٕ کھوتہٕ نزدیک۔روایژ موجوب چھُ آرکی لوکس،ہیپوناکس تہٕ سیمونایڈسن گوڈنٮ۪تھ پننٮ۪ن فن پارن منٛز طنزُک ورتاو کوٚرمُت۔امی سببہٕ چھُ طنزٕ پنٕنۍ منزل طے کٔرِتھ سدٲہمہِ صدی عیسوی منٛز انگریزی ادبس منٛز واتان ییٚتہِ جان ڈرایڈنabsalom and Achitophel جانتھن سوفٹنGulliver Travels تہٕ پوپنThe Rape of the Lockہوی شاندار ادبی فن پارٕ لیکھِتھ اتھ لول بوٚر۔

اٮ۪سے چھُ انگریز زبٲنۍ ہند لفظ یُس فرانسیسی زبٲنۍ ہندِ “ایسٲیی’’ لفظٕ منٛزٕ درامُت چھُ ۔یودوَے بعض مٲہر لسانیاتو وون زِ یہِ چھُ یونٲںۍ زبانہِ منٛز بنیٲدی موٗل تھاوان۔کینژن ہُند گف چھُ زِ امیُک بنیٲدی ماخذ چھُ عربی زبٲنۍ ہند لفظ ‘‘السعی’’۔البتٕ یتھٮ۪و مٲہرو ہیوٚک نہٕ کانٛہہ مستند،معتبر دلیلی جواز پیش کرِتھ۔ ماخذ حوالہٕ چھُ ‘‘Essay’’ لفظ کِس آگرس نٮ۪سبت علم لسانیات کیو مٲہرو گوڈنچہِ راے یسلہٕ پٲٹھۍ ترجیح دژمژ۔لغُت اعتبارٕ چھُ اٮ۪سے لفظُک معنہِ کوشش کرٕنۍ،تجربہٕ کرن وننہٕ آمُت۔

نثری چھےٚ دون شاخن منٛز تقسیم کرنہٕ آمژ۔افسانوی نثر تہٕ غٲر افسانوی نثر۔افسانوی نثرچہِ مزید لنجہِ چھےٚ داستان،ناول تہٕ افسانہٕ بیترِ۔غٲر افسانوی نثرس منٛز چھِ انشایہِ،رپوتاز سفر نامہٕ بیترِ۔ غٲر افسانوی نثرُک اکھ اہم رنگ چھُ ‘‘سوانح’’ سوانحُک موضوع چھُ کٲنسہِ أکِس فردٕ سٕنٛز زندگی متعلق تفصیلی زانکٲری آسان۔یہِ فرد ہیٚکہِ حالےَ حیات تہِ ٲسِتھ یا حال حالےٕ سٮ۪ٹھاہ برونٛہہ ییٚمہِ دُنیا گوٚمُت تہِ ٲسِتھ،سوانح نگٲری چھےٚ یورپی نثرٕ ذاتھ ۔

خود نوشت نگاری ہند ہرگاہ افادی پہلو چھُو تیٚلہِ چھِ یہِ کٲنسہِ فردٕ سندٮ۪ن نجی حالاتن انزۍ منٛزۍ گژھنُک ساروے کھوتہٕ معقول تہٕ بہتر ذریعہ۔بظٲہر چھِ خود نوشت کٲنسہِ انسان سنٛز زندگی ہٕنٛز دلیل یُس سہُ پانے قلم بند کران چھُ۔خود نوشت لیکھنہٕ خٲطرٕ چھُنہٕ کانٛہہ ادیب یا شٲعر آسُن لٲزمی شرط۔خود نوشت گژھنہٕ ہرگز تہِ زندگی ہند اڈلیٚچر درشاوُن۔یہِ گژھِ شخصیٔژہٕنٛز پانہٕ بٲومٕژ زندگی ہٕنٛز داستان ٲسِتھ ہٮ۪کُن یتھ مستقبلٕکۍ امکان روشن آسن۔امیُک مطلب چھُنہٕ یہِ زِ ییٚلہِ انسان قبرِ بٹھِس پٮ۪ٹھ واتہِ تیٚلہِ لاگہِ یہِ کٲم کرٕنۍ بلکہِ چھُ امیُک مطلب یہِ زِ ییٚلہِ انسانن زندگی ہٕنٛدۍ سٲری وسٲوۍ کھسٲوۍ وُچھمٕتۍآسن تہٕ اتھ ستۍ ستۍ زندگی ہندٮ۪ن سوکھن،دوکھن ہُند لطف تُلمُت آسٮ۪ن ییٚمیُک نہ برونٛہہ کُن أمِس کانٛہہ حسرت آسہِ تہٕ نہ آسٮ۪س کانٛہہ امکان۔

پتمہِ صدی منٛز یِم بارٕ تبدیلیہِ انسٲنی سیارس پٮ۪ٹھ رونما سپز بامے تِم تبدیلیہِ مٲدی آسہٕ یا فکری آسہٕ،تِمن سارنےٕ تندیلین ہند مرکز اوس مغربی دنیا تہٕ مغربی تہذیب ییٚتہِ پٮ۪ٹھ یِمن ہُند اثر بالواسطہٕ یا بلاواسطہٕ درس عالمن قبول کوٚر۔یہِ کتھ چھےٚ چٮ۪قہٕ زِ مگربی تہذیب چھُ فی الحال مٲدی تہٕ فکری گردش ہندِس أکِس نٔوِس صورتحالس منٛز گیر یتھ أسۍ مابعد جدیدیت ونان چھِ ۔اتھ صورتحالس منٛز چھِ کلہم مگربی معشیت،سیاست،ساینس،آرکی ٹیکچر،بشریات،فلسفہٕ،نفیسات،لسانیات،میڈیا،آرٹ،شٲعری،فکشن،تنقید علاوٕ زندگی ہندۍ باقی شعبہٕ تہِ ہٮ۪نہٕ آے۔

کُنہِ تہِ زبانہِ اندر ییٚلہِ تہِ تخلیقی باوژ ہنٛز کتھ چھےٚ وتھان تہٕ زیادٕ تر فن پارٕ چھِ دون حصن منٛز تقسیم سپدان۔اکھ گوٚو نثر تہٕ بیاکھ گٔیہِ نظم(شاعری)۔ادبی نثرکِس زُمرس منٛز یِمہٕ صنفہٕ یوان چھےٚ تمن منٛز چھےٚ داستان،ناول افسانہٕ تہٕ خاکہٕ بیترِ شٲمِل۔یِتھٮ۪ن تحریرن ہنٛز زبان چھےٚ اسہِ عام دوہہ دٮ۪نہٕ کٮ۪ن تقریرن منٛز تہِ گوشن گژھان۔شٲعری۔شٲعری منٛز چھِ غزل،مثنوی،ربٲعی تہٕ نظم بیترِ یوان۔ تاہم چھِنہٕ نثر تہٕ نظم (شٲعری) مکمل پٲٹھۍ سطحی آسان زِ اکِکۍ عنصر کیاہ ہٮ۪کن نہٕ بیٚیِس منٛز ٲسِتھ ۔وونۍ ہرگاہ أسۍ نثر نظمہِ(Prose Poem) ہٕنٛز کتھ کرو،نثری نظم چھےٚ تخلیقی ادبٕچ اکھ سو صنف یتھ منٛز نظمہٕ کٮ۪ن تہٕ نثرکٮ۪ن عنصرن پانہٕ وٲنۍ میُل سپدان چھُ ۔