ANHAAR

Department of Kashmiri

University of Kashmir

Print ISSN: 2249-510x Online ISSN: NA

موجودٕ صدی ہندس شروعس تام اوس زندگی تہٕ کایناتچہِ حقیقژ ہند ادراک یتھ ساینسی مفروضس پٮ۪ٹھ درتھ زِ پرتھ کانٛہہ چیز یا شے چھےٚ بجایہ خود موجود تہٕ کایناتی عمل چھُ علت تہٕ معلولُک پابند۔اما پوٚز موجودٕ صدی منٛز کوٚر جدید فزیکسن یہِ نظریہِ رد تہٕ یہِ انقلٲبی نطریہ کوٚرُن پیش زِ کانٛہہ چیز یا شے چھےٚ نہٕ اکھ أکِس نشِ بدون۔پرتھ کانٛہہ شے چھےٚ پانہٕ رشتن ہند اکھ زال تہٕ سۄ چھےٚ بیٚین رشتن ہندس زالس ووٗنتھ۔پرتھ کانٛہہ ذرٕ تہِ زال ہیوٗ۔کایناتکٮ۪ن چیزن تہٕ آثارن منٛز رِشتن ہند عملُک پے لگاونہٕ ستۍ ووتلیوٚو ساختیاتُک تصور تہٕ بییٚہِ آو پتہٕ بشریات،نفسیات تہٕ لسانیات ہوٮ۪ن علمی شعبن پٮ۪ٹھ تہِ آزماونہٕ تہٕ أمۍ لٔب ؤلۍ ؤلۍ شہرت تہِ امچ اہمیت آیہ تسلیم کرنہٕ۔

فلسفہٕ موٚت،منطقنواز،خاب پسند،تاب شکن،لفظ شناس،نظر باز تہٕ تر دماغ کولرج چھُ انگریز ادبس منٛز رومانی دورک اکھ نٮ۪رل شٲعر تہٕ ساروے کھۄہٕ بوٚڈ نقاد،تیوت بوٚڈ زِ ییٚلہِ تہِ عالمی معیار کٮ۪ن عظیم نقادن ہنز کتھ ووتھان چھےٚ اسہِ چھُ کولرج سند ناو تہ کنن گژھان۔

مےٚ چھُنہٕ کانٛہہ فاصلہٕ کرُن۔مےٚ چھوٕ تُہۍ تتھِس دُوتس پٮ۪ٹھ واتناوٕنۍ ییٚتٮ۪ن یہِ فٲصلہٕ کرن چھُ زِ یہِ أسۍ مشٲہدو تہٕ تجربو ستی وُچھتھ،ژینتھ تہٕ پرزنٲوِتھ ہٮ۪کو تی حقیقت ک،نہٕ تمہِ نٮ۪بر تہِ چھُ کینٛہہ۔انسانس چھِ پانژھ حٮ۪س یِمو ستی سہُ پانس اندی پکھۍ دُنیہک علم چھُ حٲصل کران۔مگر یِمن پانژن حٮ۪سن چھِ پنٕنۍ حد یِم ہٮ۪کن اسہِ دونکھٕ تہِ دِتھ۔

از برونٛہہ یوہے بہہ۱۲ ژودا ۱۴ وری سپد ریڈیو کشمیر سرنگرٕ پٮ۪ٹھٕ اکھ مباحثہٕ نشر،ییٚمیُک موضوع یہِ سوال اوس زِ اما لل دٮ۪د چھا اکھ عظیم شٲعر۔مباٛحثس منٛز کٔر مےٚ تہِ شرک تہٕ پنُن یہِ خیال باونٕچ کرم کوشش زِ لل دٮ۪د چھنہٕ تتھ معنیس منٛز بڈۍ شٲعر یتھ معنیس منٛز مثالے غالب یا شیکسپیر چھُ تکیازِ للِ ہند موضوع چھُ محدود تہٕ یک نوع ییٚلہِ زن غالبن تہٕ شیکسپیرن موضوع مقابلتا غٲر محدوٗد تہٕ رنگ برنگی چھُ ۔

مقبول شہن چھِ اصل مثنوی ہندۍ لگ بگ سٲری واقعات ترجمہٕ کرمتۍ۔مگر أمۍ چھُ اولہٕ پٮ۪ٹھٕ ٲخرس تان منظومہٕ ترجمہٕ کوٚرمُت تہٕ مثنوی ہنٛز اکے بحر ورتٲومژ۔ترجمہ کرن وزِ چھنہٕ امۍ اصل داستانٕچ کانٛہہ لوکٹہِ لوکٹہِ کھوتہٕ لوکٹ لٔنڈ ترٲومژ۔مگر کینٛہہ تمثیلی واقعات تہٕ اقوال ا امثال چھِن الگ تراومٹۍ۔یِم اقوال،امثال تہٕ تمثیلہٕ چھنہٕ داستانہٕ ستی کانٛہہ سیٚود واٹھ تھاوان تہٕ نہ چھےٚ داستانس برونٛہہ پکنس منٛز کانٛہہ مدد دوان۔

مہجور چھُ کشیرِ ہند گوڈنیُک کٲشر شٲعر ییٚمۍ کشیر أکِس حساس تہٕ دید آگاہ شٲعر سندی پٲٹھۍ وچھمژ چھےٚ۔ یہِ چھُ پوٚز زِ تس برونٹھمٮ۪ن شٲعرن ہندس کلامس منٛز تہِ چھُ کشیرِ ہندۍ عکس نظرِگژھان مگر یِم عکس چھِ بحر حال غٲر شعوٗری اندازس منٛز تہنزشٲعری اند اَمہِ کِنۍ آمت زِ یہِ شٲعری چھےٚ اکہ خاص ماحولٕچ پٲداوار۔مگر مہجور چھُ گوڈنیُک کٲشر شٲعر یہندِس کلامس منٛز کشیرِ ہندس فطری حسنس ستی ستی کشیرِ ہندس ماحولس سماجس تہٕ توٲریخی بجرس اکھ نمایاں کردار چھُ۔

صوفی شٲعری چھےٚ سرِ زمین مشرقٕچ خاص کٔرِتھ ایرانٕچ،افغانستانٕچ،پاکستانٕچ،ہندوستانٕچ تہٕ ملکِ کشمیرٕچ سٮ۪ٹھےٕ باگہِ بٔرژ مشترکہٕ ثقافتی ارزتھ ۔یہے عرفٲنی شٲعری چھےٚ عہد وسطی ہس دوران صدی وادن لوکن ہندۍ ذہن کیو دل خوف خدایس تہٕ رژں اخلٲقی قدرنن کُن مٲیِل کران روزمٕژ۔مگر چنگیزی کشت و خون وُچھِتھ صوفی شٲعری دس تُلنُک تہٕ اولین عظیم شہپارٕ بارسس اننک اعزاز کیو امتیاز چھُ فارسی زبٲنۍحٲصل سپدمُت۔

انگلستانس منٛز لٮ۪کھنہٕ ینہٕ وول انگریزۍ ادب چھا عالمی انگریز تخلیقہٕ خٲطرٕ تھدۍ معیار قٲیِم کران کِنہٕ نہَ یہِ ہیٚکہِ انگریز عٲلمن تہٕ لکھارٮ۪ن ہندِ خٲطرٕ بحث طلب ٲسِتھ۔مگر یہِ کتھ چھےٚ ماننہٕ آمژ زِ انگلستانُک نمایاں ریڈیو یعنی ‘‘بی بی سی’’ چھُ نہ صرف نشریات کِس شعبس منٛز تتھۍ معیار قٲیِم کران یِم کُنہِ تہِ ملکس منٛز امہِ شعبہ خٲطرٕ قٲبل تقلید مٲنتھ ہٮ۪کوکھ بلکہ انگریز زبٲنۍ ہندِ صحیح بامعنے تہٕ تخلیقی استعمالہ خٲطرٕ تہِ چھُ قٲبلِ قبول معیار قٲیِم کران۔

کشیر چھےٚ روزمٕژ تہِ تہٕ وننہٕ تہِ چھُ ےوان زِ یہِ چھےٚ پرٕوٲر۔وونی گوٚو پیرن ہند سبق چھُ پرن زیادٕ تہٕ سرُن کمےٕ پہن۔پیرس چھےٚ پژھ غٲبس پٮ۪ٹھ اما یُس طٲلب چھُ آسان تمِس چھُ پیرٕ سند دوٚپ شرپان اما تجسس چھُس توتہ، روزان۔تجسُس چھُ اکھ فطری وصف۔انسان چھُ پرتھ ساعتہٕ ژہانڈان روزان زِ اصل حقیقت چھےٚ کیاہ۔

قدیم یونانس منز اوس ادب عملی زندگی ہند اکھ لازمی تہٕ فعال جُز۔ادیب اوس انفٲدی تہٕ اجتمٲعی زندگی پٮ۪ٹھ غٲر معمولی اثر ہٮ۪کان تراوِتھ غٲلبن تمہِ کھوتہٕ زیادٕ یوٗت زن أزیُک سینما تہٕ ٹی۔وی چھُ تراوان۔یونانُک ڈراما،تتِچ زبان ریوایتٕچ پابند شٲعری تہٕ تتِچ سنگترٲشی ٲس ےونٲنۍ سُند جمالیاتی تہٕ روحانی غذا۔

اختر محی الدین تہٕ ہری کرشن کول نہِ وفاتہٕ پتہٕ چھُ از برونہہ وُہ وری افسانہٕ پرون تہٕ پٔتۍ مٮ۪ن وُہن ورین ہٕنٛدِس تٲریخی پسِ منظرس لیکھنہٕ آمٕتۍ افسانہٕ معاصر باسان۔اژھٮ۪ن زمانہٕ چھُ امی اندازٕ کینژن واقعن ہندِ حوالہٕ تٲریخ بنان آمُت۔نتہٕ چھِ از تہِ پتمٮ۪ن ستتھن ورین ہنٛدۍ کینٛہہ افسانہٕ نگار تہِ موجود تہٕ پرن وٲلۍتہِ۔میون گفتگو چھُ لہذا برابر ۱۹۵٠ پٮ۪ٹھٕ لیکھنہٕ اآمت افسانہٕ پنُن موضوع زانُن بہتر زانان

ہندوستانس منٛز چھےٚ زبانہِ ہنٛدِ مطالعچ روایت سٮ۪ٹھاہ پرٲنۍ۔مختلف علومن تہٕ فلسفن ستی وابستہٕ عٲلمو تہٕ مفکرو چھُ زبانہِ ہندٮ۪ن بیٚون بیٚون پہلوہن ہندِ حوالہٕ پننہِ نظریۂ فکرٕچ باوتھ کٔرمژ۔اتھ منٛز چھُ معنویاتی پہلوہن ہند بحث تہِ شٲمل۔مختلف عٲلمو چھُ لفظ تہٕ معروض کہِ رشتٕچ فطرت تہٕ خصوصیت بُنیاد بنٲوِتھ ‘‘معنی’’یُک تصور واضح کرنٕچ کوشش کٔرمٕژ۔

احمد بٹوٲرۍ چھُ دون عقیدن تہٕ فلسفن میُل کرتھ تجربہٕبنٲوِتھ پیش کران یُس ڈرامٲیی صورتحال پرٲوِتھ پرن وٲلِس قٲری یس دیدمان دِکش تہٕ رقصل منظر انان چھُ۔شاید چھُ امہ قبیلُک شعر کٲشرِ صوٗفی شٲعری منٛز گوڈنیُک تجربہٕ۔ کانٛہہ تلہِ سوال زِ سانٮ۪و بیشتر صوفی شٲعرو چھُ شاستر وونمُت یتھ معنہِ سوو تہٕ خوبصورت اظہار تہِ چھُ ۔جوابن چھُم عرض زِ سانہِ کٲشر صوفی شٲعری منٛز چھُنہٕ اسلٲمی تصۄف تہٕ شِو شاستر اکھ أکِس ستی ضم،رل یا میُل کرِتھ پیش کوٚرمُت۔بلکہِ پننِس پننِس مخصوص دٲیرس تہٕ حدوٗدس منٛز۔

ییٚمہِ مختصر پرچُک مُدعا چھُنہٕ ہمعصر کٲشرِ شٲعری ہنٛز قدر سنجی کرٕنۍ بلکہِ تمن فکری کیو ہیتی نہجن سام ہیٚنۍ یِمہٕ سانہِ ازکٲلۍ حٮ۪ساگہی ہنٛز پٲداوار چھےٚ۔ امہِ برونٛہہ زِ کتھِ تُلو دس یہِ کتھ ژٮ۪تس پاوٕنۍ چھےٚ لٲزمی زِ ادبی توٲریخس منٛز ہیٚکہِ عصریت ہتس وریس تام تہِ محیط ٲسِتھ پٮ۪ٹھٕ ییٚلہِ کٲشرِس ہشہِ لوکچہِ زبٲنۍ ہنٛدِ ہمکال شعری ادبُک بحث آسہِ۔

کٲشرِس ادبس منٛز چھُ عقیدتی تہٕ مذہبی شٲعری ہند اکھ پیش بہا سرمایہِ موجود یُس ہتہٕ واد وریو پقٹھٕ کٲشرٮ۪ن مسلمانن ایمانُک قوت بخشان روٗد۔اَتھ عقیدتی تہٕ مذہبی ادبس منٛز نبی اکرم صلی اللہ علیہ وسلمن ہٕنٛز برکت واجیٚنۍ ذاتھ تہنٛز شوٗبہٕ ونۍ صورت تہٕ سیرت،لوٗبہ ونۍ انہار تہٕ اطوار ہاونہٕ تہٕ باونہٕ علاوٕ تہنٛدۍ رنگا برنگ کمالات تہٕ معجزات دنشین اندازس منٛز بیان کرنہٕ آمتۍ تہٕ یتھ منٛز معراجُک سر سٲوۍ واقعہٕ قٲبلِ ذکر چھُ ۔

کہوٹ چھےٚ پروفیسر رحمان راہی سٕنز تنقیدی مقالہٕ سونبرن۔یہِ کتاب چھےٚ سٲنس ادبی تنقیدکِس تواریخس منٛز سو گوڈنِچ کتاب یتھ اندر ادبچہِ اہمیژ،ندرُژ تہٕ باوژ پٮ۪ٹھ غورو فکر کرنہٕ علاوٕ پرانہِ تہٕ عصری کٲشرِ شٲعری ہندٮ۪ن فنی کیو موضوعی معاملن سام ہٮ۪تھ عظیم شٲعری ہندٮ۪ن گونن تہٕ محاسنن سٮ۪ٹھاہ سنجیدگی سان بحثس دس تُل۔

‘‘اکھ دور’’ ناول چھےٚ بنسی نردوش صابن تخلیق۔ناولہِ منٛز چھُ ناول نگارن سہُ اکھ موضوع وٮ۪ژھنوومُت یُس نہٕ نردوشس برونٛہہ کٲنسہِ أکۍ کٲشِر مصنفن تخیقی ادبس منٛز وٮ۪ژھنوومُت اوس چاہے ڈراما،افسانہٕ یا ناول ٲس۔نردوش اوس پننٮ۪ن افسانن منٛز عام سمٲجی مسلن کُن زیادٕ توجہ دِوان یتھٕ پٲٹھ زن یتھ ناولہِ منٛز نظرِ چھُ گژھان۔أمۍ چھُ ناولہِ منٛز کشیرِ ہند اکھ سہُ دور وٮ۪ژھنوومُت یتھ زمانس منٛز کشیرِ منٛز زنانن ہند استحصال سپدان اوس تہٕ جسم فروشی ہندی اڈٕ ٲسۍ کُنہِ رکاوٹہٕ ورٲے چلان۔

ادبی دنیاہس منٛز تہِ انقلابی تنقیدی نطریہِ وجودس آیہِ تِمو ستۍ میوٗل ادبٕک کثیر الجہت پاس بدِ کڈنس منٛز مدد۔حالانکہِ پرتھ تنقیدی نظریہس متعلق ٲس مختلف ادب شناسن الگ الگ رایہِ ییٚمیُک نتیجہِ یہِ درٛاو زِ أکِس تنقیدی نظریہس ستی وابستہٕ نقاد روٗدۍ وقتہٕ وقتہٕ باقی نظریہن کٕٹھ کڈان تہٕ سُے نظریہِ دیتُکھ مثٲلی قرار یتھ ستی تِم پانہٕ وابستہٕ ٲسی۔امہِ ستی میوٗل ادبس فٲیدٕ تکیازِ اگر نہٕ ادبس متعلق بارسس آمتٮ۪ن تنقیدی نظریہن خلاف وقت گذرنس ستی آواز بلند گژھِ ہا ادب تہٕ تنقید روزِہا پننِس پسماندٕ محل وقوعس منٛز قٲد۔